Deyəsən, bütün dünyada istifadəçilər yavaş-yavaş süni intellektdən bezirlər. Yayılan məlumata əsasən, ChatGPT çatbotunun masaüstü və mobil cihazları əhatə edən qlobal trafiki iyun ayında 9,7% azalıb. ChatGPT veb saytına unikal ziyarətçilərin sayı da 5,7% azalıb. Həmçinin istifadəçilərin internet səhifəsində keçirdikləri vaxtın 8,5% azaldığı bildirilir. "OpenAI"nin məşhur çatbotu noyabr ayında istifadəyə verildikdən sonra ilk dəfədir ki, trafik azalması ilə üzləşir.

Maraq niyə azalıb?

Trafikdəki bu azalma çatbotun artıq ilk günlərdə olduğu qədər maraqlı olmadığını göstərir. Digər tərəfdən "ChatGPT"nin pulsuz versiyasının tez-tez köhnəlmiş məlumatlar əsasında məlumat verməsi ilə əlaqədar ola bilər. Çünki çatbotun hazırkı bilik bazasına 2021-ci ildən sonrakı dövr daxil deyil. Üstəlik yay tətili saytların trafikinin azalmasına səbəb ola bilər. Məktəblərin bağlanması ilə tələbələr indi ev tapşırığı üçün ChatGPT-dən daha az istifadə edirlər. Süni intellektə əsaslanan çatbotlara marağın azalması yalnız ChatGPT ilə məhdudlaşmır. Microsoft Bing proqramlarının endirilməsinin 38% azaldığı da bildirilir.