Audi şirkəti Twitter reklamlarını dayandırdı!

Qida şirkəti General Mills, Oreo istehsalçısı Mondelez International, Pfizer və Volkswagen, Audi şirkəti İlon Mask tərəfindən satın alındıqdan sonra Twitter reklamlarını müvəqqəti dayandıran nəhəng şirkətlərdir. İlon Maskın “Twitter”də köklü dəyişikliklər etməsi və kontentlə bağlı fərqli fikirlərə sahib olması qeyri-müəyyənlik yaradır. Yuxarıda qeyd etdiyimiz şirkətlərin bəziləri bu qeyri-müəyyənlikdən narahat olaraq bir müddət “Twitter”də reklam etməyəcəklərini açıqladılar. Audi və qida şirkəti General Mills Twitter reklamlarını dayandırdıqlarını elan edən son şirkətlər oldu. Bir müddət əvvəl də General Motors Twitter reklamlarını dayandırdığını bildirdi. Eyni zamanda böyük reklam agentliyinin meneceri bəyan edib ki, onun 20-yə yaxın müştərisi müvəqqəti olaraq Twitter reklamlarını dayandırıb. İş o yerə çatıb ki, onsuz da enişli-yoxuşlu platforma olan “Twitter”in son vaxtlar qeyri-müəyyən strukturu onu Google və Meta kimi platformalarla müqayisədə reklam verənlərin gözündə cəlbedici etmir.

Digər tərəfdən, İlon Mask Coca-Cola, Unilever və Google kimi müştəriləri olan dünyanın ən böyük reklam şirkəti WPP PLC başda olmaqla müxtəlif reklam şirkətləri ilə görüşlərini davam etdirir. Keçirilən görüşlərdə “Twitter”in reklamçılar üçün təhlükəsiz olduğu və botların silinməsi ilə gələcəkdə daha təhlükəsiz olacağı vurğulanır.