"Apple"ın 2027 hədəfi: yalnız OLED displeylər!

Texnologiya nəhəngi Apple şirkəti əksər məhsullarında LCD və mini LED ekranlardan istifadə edir. Ortaya çıxan yeni hesabata görə, şirkətin 2027-ci il üçün daha yaxşı bir hədəfi var. Demək olar ki, bütün məhsullarında OLED ekranlardan istifadə edəcək Apple 32 düym və 42 düymlük xarici displey də istehsal etməyi hədəfləyir.

Omdia-nın ən son BT OLED displey proqnozları iddia edir ki, dünya üzrə OLED tədarükləri 2022-ci ildə təxminən 9,7 milyon ədəd olub, 2028-ci ildə isə 70 milyondan çox olacaq. Bu artımın böyük hissəsi notbuklar hesabına təmin edilsə də, OLED planşetlərinin sayı da xeyli artacaq.

Bu gözlənilən artımın əsas səbəbkarı “Apple”ın cihazlarında OLED ekranlardan istifadənin artması olacaq. Məlumata görə, Apple gələn ildən yeni iPad Pro modellərindən başlayaraq iPad üçün OLED panellərə, daha sonra 2026-cı ildə OLED MacBook Pro-ya keçəcək. Bundan əlavə, Apple 2026-cı ilə qədər mobil cihazlarda LCD və mini-LED displeylərdən demək olar ki, tamamilə imtina edəcək.

“Apple”ın xarici ekran planlarına gəldikdə, hesabatlar göstərir ki, Apple 2027-ci ildə biri 32 düym, digəri 42 düymlük bir cüt OLED xarici displey istehsal edəcək. Bunların Pro Display XDR və Studio Display kimi müstəqil xarici displeylər və ya gələcək iMac-də istifadə üçün panellər olacağı hələ məlum deyil.