2022-ci ildə Apple, iPhone-ları abunəlik əsasında satmağı planlaşdırırdı. Lakin son məlumatlara əsasən, şirkət bu fikirdən geri çəkilib.
Apple-ın planına görə, istifadəçilər aylıq müəyyən bir məbləğ ödəməklə iPhone əldə edə biləcəkdilər. Bəzi hallarda isə əlavə ödəniş etmədən yeni modellərə keçid etmək mümkün olacaqdı. Şirkət hesab edirdi ki, bu sistem həm iPhone satışını artıracaq, həm də Apple-a davamlı gəlir mənbəyi təmin edəcək.
Bu qərarın əsas səbəbi olaraq tənzimləmə problemləri göstərilir. Bloomberg-in məlumatına görə, aylıq ödənişlər Apple-ın kredit kartı şirkətləri kimi tənzimlənməsinə səbəb ola bilərdi və şirkət bu cür nəzarətə məruz qalmaq istəmirdi. Həmçinin, bu abunəlik planının operatorlarla münasibətlərdə problemlər yarada biləcəyi ehtimal edilirdi.
Apple-ın bu xidmət üzərində işləməyi nə vaxt dayandırdığı məlum deyil. Lakin xidmət üzərində çalışan komandanın bir neçə ay əvvəl başqa layihələrə yönləndirildiyi ehtimal olunur.
