Apple, iPhone 17-nin baza və Plus modellərində çox tənqid olunan 60 Hz yeniləmə sürətindən imtina edə bilər. Gələn il iPhone 17 seriyasının bütün modellərində yüksək yeniləmə sürətinin mövcud olacağı gözlənilir.
Apple iPhone 16 seriyasını təqdim etdikdə, standart iPhone 16 və iPhone 16 Plus modellərinin hələ də 60 Hz yeniləmə sürətinə malik ekranlara sahib olması çoxlarını məyus etmişdi. Hətta giriş səviyyəli Android telefonlarda belə yüksək yeniləmə sürətləri standart hala gəldiyi bir zamanda, Apple-ın 800 dollar dəyərində olan telefonlarında 60 Hz israr etməsi sərt tənqidlərə səbəb olmuşdu. Ancaq iPhone 17 ilə birlikdə bu vəziyyət dəyişə bilər.
Digital Chat Station adlı məşhur Weibo istifadəçisi, Apple-ın standart və Plus modellərdə ekran yeniləmə sürətini artırmaq niyyətində olduğunu bildirib. Lakin yeniləmə sürətinin nə qədər olacağı barədə təfərrüatlar paylaşılmayıb.
Xatırladaq ki, iPhone Pro və Pro Max modelləri 1 Hz-dən 120 Hz-ə qədər dəyişə bilən ProMotion ekran texnologiyasından istifadə edir. Bu texnologiya sayəsində ekran yeniləmə sürəti dinamik olaraq tənzimlənir və enerji qənaəti təmin olunur. Apple-ın bu texnologiyanı qeyri-Pro modellərinə gətirəcəyi gözlənilir. Bununla yanaşı, 90 Hz və ya 120 Hz sabit yeniləmə sürətləri təklif etməsi də mümkündür. Hazırda Apple-ın hansı seçimi edəcəyi məlum deyil.
