Apple iPhone 15-lə əzəli problemlərini həll edəcək!

“Apple”ın yeni nəsil iPhone-larla simsiz enerji doldurma ilə bağlı böyük problemini həll edəcəyi bildirilir. Şirkət üçüncü tərəf istehsalçıların simsiz enerji doldurma cihazlarında maksimum gücünü məhdudlaşdırmayacaq.

Bildiyiniz kimi, iPhone 12, iPhone 13 və iPhone 14 smartfonlarında 15 Vt simsiz enerji doldurma sürətinə nail olmaq üçün yalnız Apple şirkətinin rəsmi MagSafe maqnit simsiz enerji doldurma cihazı və ya rəsmi MFM (Made for MagSafe) sertifikatına malik bahalı enerji doldurma cihazları tələb olunur. Qi sertifikatlı simsiz enerji doldurma cihazları maksimum 7,5 Vt güc təmin edə bilir.

Narahatedici məhdudiyyət qaldırılır

Bu, iPhone 15 seriyasının təqdimatı ilə yaxşılığa doğru dəyişəcək. Koreyanın Naver bloqunda yer alan xəbərə görə, Apple yeni smartfonları ilə MagSafe sertifikatı olmayan üçüncü tərəf şarj cihazlarının da maksimum 15 Vt gücünə çıxmasına icazə verəcək.

Xatırladaq ki, Lightning-dən USB-C-yə keçid nəzəri olaraq "Apple"a simli doldurma sürətini 27 Vt-dan ən azı 45-65 Vt-a qədər artırmağa imkan verəcək. Ancaq hələlik bu mövzuda məlumat yoxdur. Cupertino şirkətinin sentyabr ayında iPhone 15 seriyasını təqdim edəcəyi gözlənilir.