Apple əməkdaşı şirkətə qarşı məhkəmə iddiası qaldırdı: Telefonlarımız izlənir!

Apple, bir əməkdaşının qaldırdığı məhkəmə iddiası ilə gündəmə gəldi. Şirkətin keçmiş əməkdaşı iddia edir ki, Apple iş məqsədilə şəxsi cihazların istifadəsini məcburi edib və izləmək üçün həmin cihazlara xüsusi proqram təminatı quraşdırıb.

Apple cihaz izləmə texnologiyası ilə ittiham olunur!

Şirkətin siyasətinə görə, əməkdaşlar yalnız Apple cihazları ilə işləməlidirlər. Ancaq iş üçün verilən cihazlar o qədər məhdudlaşdırılıb ki, bir çox əməkdaş şəxsi cihazlarından istifadə etməyə məcbur olur və ya iş cihazlarını şəxsi iCloud hesablarına qoşurlar. Bununla belə, bu addımı atmaq üçün işçilər Apple-ın cihazda və ya iCloud-da saxlanılan hər bir məlumatı izləməsinə imkan verən proqram təminatını yükləməlidir.

Məhkəmə iddiasında, Apple-ın siyasətlərinin işçiləri işdən kənarda belə izləməyə imkan verdiyi vurğulanır. Şirkətin reklam texnologiyası şöbəsinin əməkdaşı, şəxsi cihazların izlənməsi ilə əlaqədar olaraq Apple-a qarşı məhkəmə iddiası qaldırıb. O, məcburi quraşdırılan proqram vasitəsilə cihazdakı və iCloud-dakı hər şeyə nəzarət edildiyini qeyd edib.