Android telefonlarının necə olması lazım olduğunu göstərmək üçün Pixel markasını quran Google son illərdə bu seriyada bir çox uğurlu telefon çıxardı. Bu markada münasib qiymətə telefonlar da istehsal edən şirkət gələn il “Pixel 7a”ni təqdim edəcək. Keçən həftədə baş verən texniki sızıntılardan sonra artıq cihazdan ilk görüntü gəldi. Mobil texnologiya dünyasında etibarlı mənbə kimi tanınan @OnLeaks, XDA Developers vasitəsilə “Pixel 7a”nın ilk şəklini paylaşdı. Çıxan fotolarda smartfonun ağ versiyası nümayiş olunub və görünən budur ki, Pixel 6a, Pixel 7 ilə çox oxşardır. Həmçinin, Smartprix-dən verilən məlumata görə, “Pixel 7a”nın ölçüsü Pixel 6a ilə demək olar ki, eynidir.

Bununla belə, məhsulun kamerası “Pixel 6a”dan fərqli olaraq metal ərintidən hazırlanıb və qurğu Pixel 7 və “Pixel 7 Pro”dan daha qalın çərçivələrə malikdir. Yəqin ki, may ayında keçiriləcək I/O Developer Konfransında təqdim ediləcək Pixel 7a əvvəlki nəsillə müqayisədə əhəmiyyətli təkmilləşdirmələrə sahib olacaq. Cihazın Tensor G2 prosessoru, 90Hz Samsung displeyi və simsiz enerji doldurmanı dəstəkləyən keramika korpusu olacağı gözlənilir. Google smartfonun qiymətində artım etməsə, Pixel 7a 2023-cü ilin ən uğurlu telefonlarından biri olacaq.